jan li lon poka lupa tomo. ona li lukin e lupa la, telo li lon. mun li pana e suno walo lon sewi telo, taso lili li tawa lupa tan telo. telo li tawa la, suno mun lili li tawa li ante lon tenpo ale, li pana e selo suno tawa lon insa tomo.

tomo ni li tomo pi telo nasa. jan mute lili ante li lon poka supa, li moku e telo li toki li kalama. kon li musi, ale li pona.

tenpo li kama li tawa, jan mute li pini e moku, li tawa weka tan tomo. taso, jan li awen lon poka lupa.

jan pali pi telo nasa li toki e ni tawa jan: “sina wile ala wile e ijo sin?”

jan li tawa e supa, li pana e poki pi telo ala lon supa. “mi wile ala e telo nasa.” jan li toki e ni, “taso, moku li pona tawa mi.”

“moku seme?”

“tenpo pini mute la, mi pini e moku pi telo nasa la, mi moku e telo soweli seli. tomo wan pi telo soweli li lon poka tomo mi, telo pi tomo ni li pona mute a, mi olin mute e telo ni. tan ni la, mi moku e telo soweli lon tenpo ale. moku li pini la, telo nasa li nasa ala tawa mi.” musi li lon sinpin jan li lon kalama jan.

“taso, telo kala taso li lon.” jan pali li toki e ni.

“mi sona e ni. telo kala li pona, taso telo soweli li pona mute.” jan li toki, pilin pakala li lon sinpin ona. “tenpo li ante. ale li ike. tenpo pakala li kama li pini la, jan ale li weka e ma, li tawa anpa telo. soweli li lon ala anpa telo, kala li lon taso. mi pilin ike mute tan ni: tenpo kama la, moku soweli en telo soweli li lon ala.”

“lon a.”

toki li pini. jan tu li kalama ala li awen. ken la, toki insa li lon. suno mun lili li kama ala, tan ni la, lupa li kama pimeja.

“mi tawa.” jan li toki e ni, li wile tawa e lupa weka.

“o awen.” jan pali li toki e ni tawa jan. “mi wile pana e ijo tawa sina.”

jan pali li jo e poki tan supa suli lon monsi ona.

“mi wile ala e telo nasa. mi nasa mute lon tenpo ni.”

“ni li telo nasa ala.” jan pali li jo e poki lili kin, li pana e telo tawa poki lili tan poki ante. “o alasa moku e telo ni.”

“seme li ni?” jan li nena e telo. pilin nasa li kama lon sinpin. “telo soweli?”

“lon. ni li telo soweli. telo lili li lon, taso sina jan pona mi la, mi wile pana e telo mute lili tawa sina.” jan pali li toki, li pana e poki suli tawa supa monsi.

jan li pilin nasa mute. ona li moku lili e telo. telo li lete, taso kon soweli li pona kin, li sama sona tan tenpo pini mute. telo lukin li tawa lon sinpin jan. “ni li sewi a. sina jo e telo ni tan seme?”

“anpa telo la, soweli li lon kin. taso, lili li lon.” jan pali li tawa e lawa ona. “lon tenpo pakala la, jan pali pi jan lawa li alasa e soweli, li wile moku e soweli lon tomo pi anpa telo, li wile pana e soweli tawa jan ale. taso, tenpo li mute ala. jan pali li alasa e soweli mute lili taso. jan lawa li jo e soweli pi nanpa lili la, ona li toki e ni: ’nanpa soweli li lili la, mi ken ala pana e soweli tawa jan ale. soweli ale li moli la, soweli li lon ala lon tenpo kama.’ ni la, ona li pana ala e sona ni tawa jan ale. jan lili taso li sona e ni. taso, jan pona mi li jan pali pi jan lawa. sina moli e soweli li pali e moku tan soweli tawa jan lawa lon tenpo lili. tenpo wan la, sina jo e kiwen soweli tan ijo jaki li pana e kiwen tawa mi. lon tenpo pi jan ala la, mi seli e kiwen lon telo la, mi pali e telo soweli ni.”

“tenpo pini mute la, telo nasa li telo pi suno mun.” jan pali li pana e mu musi. “tenpo ni la, telo soweli li telo pi suno mun.”